Musk ko Tesla CEO pad chhodne ka aadesh

Tesla CEO ke khilaf awaaz uthi

Elon Musk, jinhe hum sab Tesla aur X (pehle Twitter) ke boss ke roop mein jaante hain, unke khilaf ab nayi musibat khadi ho gayi hai. Tesla ke ek purane investor, Ross Gerber, ne khuleaam kaha hai ki Elon Musk ko CEO pad chhod dena chahiye. Unka kehna hai ki Elon Musk White House mein zyada busy hain, jiske wajah se Tesla company mushkil mein hai.

’Elon Musk Tesla ko bhool gaye hain’

Gerber Kawasaki Wealth Management ke CEO, Ross Gerber ne Sky News ko bataya, “Ismein koi shak nahi ki Elon Musk government mein apna time de rahe hain. Woh Tesla ko nahi sambhal rahe hain.” Gerber ne kaha, “Mujhe lagta hai ki Tesla ko ek naye CEO ki zaroorat hai. Business ko bahut dinon se nazarandaz kiya ja raha hai.”

Kab se invest kar rahe hain Gerber?

Gerber Kawasaki, ek decade se zyada time se Tesla mein invest karta aa raha hai, jab se Musk company ke CEO hain. February 2025 tak, unke paas 262,352 shares hain. Bade shareholders mein se toh nahi hain, lekin 2023 se woh apne shares kam karte aa rahe hain. Ross Gerber, company board mein badlaav ke liye awaaz uthate rahe hain, aur jab se Musk White House se jude hain, woh Musk ki aur bhi aalochna karne lage hain.

’Ya toh Tesla ya fir government’

Gerber ne kaha, “Tesla ke paas bahut saare important kaam hain. Ya toh Elon Musk Tesla mein CEO banke wapas aa jayein aur apne dusre kaam chhod dein, ya phir woh government ke kaam mein lage rahein aur Tesla ke liye koi dusra CEO dhundh lein.”

Tesla ke shares gir rahe hain

Pichle paanch dinon mein Tesla ke shares 5% gir gaye hain aur December ke peak se 50% se bhi zyada down hain. Gerber ka kehna hai ki isliye leadership change bahut zaroori hai.

Twitter (X) bhi ek wajah

Unka yeh bhi kehna hai ki Musk Twitter (ab X) mein itna busy ho gaye the ki unhone Tesla par dhyan dena hi chhod diya, aur is wajah se Tesla ki image kharab hui. “Elon Musk ki wajah se company ki reputation barbaad ho gayi hai,” unhone kaha. “Sales gir rahi hain, toh haan, yeh ek crisis hai. Aap market ka best product bhi nahi bech sakte agar aapka CEO itna controversial ho.”

Logon ne bhi virodh kiya

Musk ke khilaf log bhi gusse mein hain. French entrepreneur Romain Roy, jo apni company ke liye Tesla EVs use karte the, unhone US policies aur Elon Musk ke khilaf protest karte hue ek deal cancel kar di. Musk ke statements aur US environmental policies se upset hokar, Roy ne 15 Teslas ka order cancel kar diya aur European brands choose kiye.

Tesla dealerships par hamle

Tesla ke dealerships par bhi protest aur vandalism ho rahe hain. Is mahine Oregon ke ek Tesla showroom par firing hui, jabki Boston mein company ke charging stations mein aag laga di gayi. Lower Manhattan mein ek Tesla dealership ke bahar violent protests kar rahe logon ko police ne arrest bhi kiya hai.

Germany mein sales giri

Ek report ke mutaabik, Europe ke sabse bade EV market, Germany mein, Tesla ki sales pichle saal ke mukable February mein 76% gir gayi hain.

Leave a Comment

Your email address will not be published. Required fields are marked *

Scroll to Top