Starc ne kiya Rahul ki tareef, bole ‘Mr. Fix-It’
Champions Trophy 2025 jeetne ke baad, Australian fast bowler Mitchell Starc ne Indian cricket team, khaaskar KL Rahul, ki jamkar tareef ki hai. Starc, jo personal reasons ki wajah se tournament mein nahi khel paaye the, ne Rahul ko “Mr. Fix-It” ka naam diya hai. Unhone kaha ki Rahul ne team ke liye kayi roles nibhaye hain – opening batting, No. 6 pe batting, wicketkeeping, aur fielding. Reports ke mutaabik, Starc ne Fanatics TV Youtube channel pe kaha, “KL Rahul toh India ke liye Mr. Fix-it hai – Jab kaha gaya open kiya, No. 6 pe khela, keeping ki, fielding ki, middle order mein bhi khela — yaani sab kuch kar diya! Har role mein kamaal dikhaya. Unke saath khelne ka besabri se intezaar hai.”
Rahul ne Champions Trophy mein machaya dhamaka
Rahul ne Champions Trophy mein chaar innings mein 140 runs banaye aur saare matches mein wicketkeeping bhi ki. Woh end tak crease pe tike rahe jab India ne title jeeta. Unki yeh performance dekh kar sabhi unki tareef kar rahe hain.
Rahul ko top-order batting pasand hai
Hamesha consistent performance dene wale Rahul apne batting order ki position se khush hain, lekin agar choice di jaye toh woh top-order mein batting karna zyada pasand karenge. Rahul ne kaha, “Main top-order batter ban kar hi bada hua hun. 11 saal ki umar mein Mangalore mein pehle competitive match se lekar India ke liye shuruati dino tak, aur apne career ke zyadatar hisse mein, main top-order batter raha hun. Mujhe is position mein sabse zyada comfortable lagta hai aur yeh mujhe natural lagta hai.”
Team ke liye kuch bhi karenge Rahul
Rahul ne aage JioHotstar se baat karte hue kaha, “Jab aap team sport khelte hain, toh aapko hamesha woh choose karne ko nahi milta jo aap chahte hain. Aapko flexible hona padta hai aur team ki zarurat ke hisab se adapt karna padta hai. Saalon mein, maine yeh seekha hai ki main is baat ko accept karun aur jo bhi role mujhe diya jaye usme apna best dun.”
IPL mein Delhi Capitals ki captaincy se mana kiya
Reports ke mutaabik, Rahul, jinhone pehle Punjab Kings aur Lucknow Super Giants ki captaincy ki hai, ne aane wale IPL mein apni nayi franchise Delhi Capitals ki captaincy karne se mana kar diya hai. Yeh news cricket fans ke liye kaafi interesting hai. Dekhna hoga ki Delhi Capitals ab kisko captain banati hai.
