UK tourist ko Dilli mein dhokha, Instagram friend ne kiya rape
Dilli mein ek foreign tourist ke saath bada hi ghinoni harkat hua hai. Ek British citizen, jo apne Instagram friend se milne Delhi aayi thi, uske saath Mahipalpur hotel mein rape hua hai. Police ne aaropi Kailash ko giraftaar kar liya hai, aur uske dost Wasim par bhi molestation ka aarop hai.
Goa trip se Delhi kaise pahunchi victim?
Reports ke mutaabik, yeh mahila Maharashtra aur Goa mein ghumne aayi thi. Goa se usne Kailash ko phone kiya aur use aane ko kaha. Kailash ne kaha ki woh travel nahi kar sakta aur usse Delhi aane ko bola. Ladki mangalwar ko Delhi pahunchi aur Mahipalpur ke ek hotel mein ruk gayi. Usne Kailash ko call kiya, aur woh apne dost Wasim ke saath hotel aa gaya. Usi raat usne us ladki ke sath zabardasti ki.
Agale din police station pahunchi victim
Dusre din subah, woh mahila Vasant Kunj police station gayi aur FIR darj karayi. Guidelines ke hisab se, police ne British High Commission ko is ghatna ki jaankari de di hai aur woh UK national ki madad kar rahe hain.
Google Translate se karta tha baat
Kailash ek private company mein kaam karta hai. Mahila ne police ko bataya ki Kailash ko English bolne mein dikkat hoti thi aur woh Google Translate ka use karke usse baat karta tha.
Social media par gussa
Yeh khabar sunke social media par log kaafi gusse mein hain. Log is ghatna ki kadi ninda kar rahe hain aur aaropiyon ko sakht se sakht saza dene ki maang kar rahe hain. Is ghatna se ek baar phir sawaal uth raha hai ki kya humara desh foreign tourists ke liye safe hai?
Kya hai aage ki karyawahi?
Police is mamle ki jaanch kar rahi hai aur aaropiyon se poochtach kar rahi hai. Dekhna hoga ki is case mein kya faisla aata hai aur victim ko insaaf milta hai ya nahi.
